ԱՄՆ-ում Սերժ Սարգսյանը ինչ-որ փաստաթուղթ է ստորագրել

Ասում է ազգային անվտանգության նախկին փոխնախարար, ՍԴՀԿ անդամ Գուրգեն Եղիազարյանը

- Պարոն Եղիազարյան, ինչպե՞ս եք գնահատում Սերժ Սարգսյանի ամերիկյան հանդիպումները: 

- Մեր արտաքին քաղաքականությունը ունի շատ լուրջ առանձնահատկություն, այն է` ցանկացած հանդիպումից հետո մենք երբեք ոչ մի բան չենք իմանում: Որպես կանոն, դրա մասին մենք իմանում ենք օտարերկրյա մամուլից: Այս անգամ, ինչպես միշտ, դրա մասին խոսելու է թուրքական մամուլը, հետո սրանք սկսելու են կցկտուր հերքել այդ ամեն ինչը, շատ կցկտուր, անբնական, իսկ հետո մենք տեսնելու ենք, որ այն ամենը, ինչ թուրքերը գրել են, համապատասխանում է ճշմարտությանը: Այս հանդիպումները ինձ վրա ողբալի տպավորություն են թողել, նախեւառաջ, մերոնց դեմքերն էին շատ մտազբաղ, նույնիսկ Էդվարդ Նալբանդյանի ասուլիսի ժամանակ երեւաց, որ նա ընդհանրապես ընկճված է: Այսինքն` մենք այս ամեն ինչից կարող ենք եզրակացություն անել, որ մենք հերթական անգամ խայտառակ, ծանր պարտություն ենք կրել:
Չեմ կարող ասել, թե ո՞ր սպորտաձեւի մեջ, ո՞ր դիվանագիտության, բայց որ խայտառակ պարտություն է` դա միանշանակ է: Ավելին` եթե ուշադիր նայենք, այդ հանդիպումից հետո Երեւանում ասես սուգ լինի: Որովհետեւ նախկինում, նման դեպքերում ամենաթեթեւ նախադասության միջից թեկուզ մի բառ էին հանում լրատվամիջոցները եւ սկսում էին հեքիաթներ հորինել: Այս անգամ նույնիսկ այդ հեքիաթները չհորինեցին` ոչ հ1-ով, ոչ հ2-ով եւ ոչ էլ մնացած ալիքներով: Մենք հիմա արդեն գիտենք, թուրքական մամուլից իմացանք, որ խոսք է գնացել ճանապարհային քարտեզի մասին եւ ոչ միայն խոսք է գնացել, այլ նաեւ Ղարաբաղի հարցով ժամանակացույց է քննարկվել` զորքերի դուրսբերման հարցով: Եթե այս տեղեկությունն էլ հաստատվի, ուրեմն սա խայտառակության վերջն է:

- Կարծում եք` այդ հանդիպումներից հետո Սերժ Սարգսյանի արձակուրդ գնալը պատահականությո՞ւն էր: 

- Կարծում եմ, որ իրավիճակը գնահատելու, քայլերը կշռադատելու եւ որոշումներ կայացնելու համար «թայմ աութի» պես մի բան է արտասահմանը: Սարգսյանի հետ խորհրդակցությունը կլինի այն երկրի նախագահի հետ, որտեղ նա կգնա: Ամենայն հավանականությամբ, դա կլինի Մինսկի եռանախագահող երկրներից մեկում: Ըստ երեւույթին, Փարիզում, որտեղ նա կխոսի Ֆրանսիայի նախագահ Սարկոզիի հետ:

- ԱՄՆ նախագահ Բարաք Օբաման խոսեց այն մասին, որ ինքը սատարում է Հայաստանի ժողովրդավարությունը: Ըստ ձեզ` ԱՄՆ նախագահը դրանով ի՞նչ էր ուզում ասել, արդյո՞ք դա ԱՄՆ նախագահի կողմից Սարգսյանին տրված OK չէ:

- Նախ ասեմ, որ Օբաման Սերժ Սարգսյանին ընդհանրապես նկատի չի ունեցել: Եթե նա Սարգսյանին նկատի ունենար, ապա նույն նախագահ Օբամայի երկրի Պետքարտուղարությունը 86 էջի վրա չէր տպագրի այն խայտառակությունը, թե ինչպես են Հայաստանում ոտնահարվում մարդու իրավունքները: Եվ այդ սատարելը ես ուղիղ հասկանում եմ այնպես, որ այո, նախագահ Օբաման պետք է սատարի Հայաստանում մարդու իրավունքների պաշտպանությունը: Եվ ես ողջունում եմ այդ հայտարարությունը: Եթե նման բան լինի, եթե Օբաման իր նկատի ունեցածը անի, ապա Պրեսկոտները մեր երկիր էլ չեն գա:

- Կարծիքներ կան, սակայն, որ Օբաման, ըստ էության, աջակցություն հայտնեց Սարգսյանին:

- Ամենավատն այն է, որ այդ արեւմտյան տերությունները, եւ ընդհանրապես արտասահմանը մեզանից սպասելիքներ ունի, եւ այդ սպասելիքները, իհարկե, չեն վերաբերում մեզ աջակցելուն: Այդ սպասելիքները տարածքների վերադարձի հետ են կապված:

- Այսինքն` կարծում եք, որ Օբամայի կողմից` աջակցության տարր, այնուամենայնիվ, եղե՞լ է: 

- Այո՛: Բայց այդ աջակցությունը, ինչպես ռուսներն են ասում` ոՏՍՏՎ ՉօռՊպՑ.

- Ինչպիսի՞ն կլինի Սերժ Սարգսյանի ամերիկյան հանդիպումների ազդեցությունը Հայաստանի ներքաղաքական կյանքի եւ մասնավորապես Համաժողովրդական շարժման վրա, նրա անելիքների ու գործողությունների վրա: 

- Հիմա գնահատական տալ չեմ կարող, որովհետեւ ամեն ինչ կախված է նրանից, թե իրադարձություններն ինչպիսի արագությամբ կզարգանան: Իմ կանխատեսումներով` պարզություն կլինի մայիս ամսին:

- Ինչո՞ւ հենց մայիսին: 

- Որովհետեւ մինչեւ Սերժ Սարգսյանը գնա արձակուրդ, մինչեւ գա, հետո պահանջները ավելի առարկայական կդառնան, եւ միգուցե արդեն այդ ժամանակ մենք կիմանանք վերջապես, թե ի՞նչ է ստորագրել Սարգսյանը ԱՄՆ-ում: Իսկ դա կլինի արդեն մայիսին:

- Այսինքն` կարծում եք, որ ԱՄՆ-ում Սարգսյանը ինչ-որ փաստաթո՞ւղթ է ստորագրել:

- Իմ կարծիքով` այո՛: Եվ այս մասին վկայում է նաեւ այս խորհրդավոր լռությունը:

- Ըստ ձեզ` ո՞ր հարցում է փաստաթուղթ ստորագրվել` հայ-թուրքական հարաբերությունների՞ հետ կապված, թե՞ Ղարաբաղի հակամարտության հարցով: 

- Ես կարծում եմ, որ դա եռանկյունի է եղել` հայ-թուրքականն ու Ղարաբաղը միասին: Ամենայն հավանականությամբ, դա եղել է ինչ-որ ժամանակացույց: Դրա համար էլ Դավութօղլուն հերքում է տալիս, որ ինքը ադրբեջանական ԶԼՄ-ներին նման հարցազրույց չի տվել, որ նման բան չի եղել: Դուք երբեւէ նման բան հիշո՞ւմ եք: Ուրեմն, այնքան են կարեւորում հիմա դրա մասին չխոսելու խնդիրը, որ դիմում են նման կեղծիքի:

- Պարոն Եղիազարյան, այս իրավիճակում ի՞նչ քայլեր պիտի անի ընդդիմությունը: 

- Ընդդիմությունը այսօր տեղեկատվության պակաս ունի: Մենք այսօր ընդամենը կարող ենք ենթադրել: Մենք չենք մասնակցում բանակցային գործընթացներին, մենք փաստաթղթեր չենք կարդում: Մենք ուղղակի ենթադրում ենք, թե ինչ կարող է լինել եւ ուր է գնում Հայաստանը:

- Այսինքն` ընդդիմությունը պետք է սպասի՞: 

- Մենք պետք է ստույգ ինֆորմացիա ունենանք: Այդ դեպքում արդեն ընդդիմությունը կանի իր քայլերը, եւ բնականաբար այդ քայլերը կլինեն իրավիճակին համարժեք:
http://www.zhamanak.com/article/14720/
Քրիստինե Խանումյան