Ի՞ՆՉ Է ՈՒԶՈՒՄ ՄԻ ԹԵՎԸ ՄՅՈՒՍԻՑ

Սոցիալ-դեմոկրատ Հնչակյան կուսակցության ներսում տեղի ունեցած վերջին իրադարձությունների կապակցությամբ` երեկ ՍԴՀԿ ատենապետ Լյուդմիլա Սարգսյանը պատասխանել է մեր մի քանի հարցերի։

- Տիկին Սարգսյան, կարո՞ղ եք ասել, թե ինչ էր նշանակում «Ժառանգությունից» հեռացված ԱԺ պատգամավոր Վարդան Խաչատրյանի ՍԴՀԿ մտնելը, նորից դուրս գալը, նորից մտնելը։ Հիմա հնարավո՞ր է, որ Խաչատրյանը նորից դուրս գա ՍԴՀԿ-ից։ Ի՞նչ է կատարվում ՍԴՀԿ-ում։

- Նախ, Վարդան Խաչատրյանը հիմա ՍԴՀԿ անդամ չէ, որ նորից դուրս գա։ Ինչ վերաբերում է նրա մուտքին, քանի որ մինչեւ Վարդան Խաչատրյանը նման նախադեպ չէր եղել, որ այլ կուսակցությունից մեկ ամիս առաջ հեռացված մեկը անդամագրվեր մեր կուսակցությանը, տեղի ունեցավ վրիպում, որի արդյունքում նա իբր թե անդամագրվեց ՍԴՀԿ-ին։ Սրանից հետո վարչության ամենահին անդամները, թերթից տեղեկանալով Վարդան Խաչատրյանի անդամության մասին եւ իմանալով նրա հեռացման նախապատմությունը, հիշեցրեցին Կանոնադրության` անդամության մասին կետի պահանջը եւ պահանջեցին Վարդան Խաչատրյանի անդամության դադարեցումը։ Վարչությունը կայացրեց այդ որոշումը, եւ Վարդան Խաչատրյանը հեռացվեց։ Որից հետո եղավ եւս մի հայտարարություն` ՍԴՀԿ մամուլի խոսնակի կողմից, որը մենք նույնպես հերքեցինք` տեղեկացնելով, որ Վարդան Խաչատրյանը ՍԴՀԿ անդամ չէ։ Հիմա կատարվեց 3-րդ փորձը, եւ Վարդան Խաչատրյանը եւ Վահան Շիրխանյանը հայտարարեցին, որ նա ՍԴՀԿ Քաղաքական դիվանի անդամ է, որը մեզ խիստ զարմացրեց. չլինելով Հնչակյան կուսակցության անդամ` ինչպե՞ս նա հայտնվեց ՍԴՀԿ Կենտրոնական վարչության Քաղաքական դիվանում։ Շատ հետաքրքիր մի վիճակ է. եթե Վարդան Խաչատրյանը հայաստանյան կառույցի անդամ չէ, ապա ո՞ր վիրտուալ երկրի Հնչակյան կուսակցության անդամ է, որի արդյունքում հայտնվել է ՍԴՀԿ Կենտրոնական վարչության Քաղաքական դիվանում։ Եթե նույնիսկ Կենտրոնական վարչությունը նման որոշում կայացրել է, ապա դա անօրինական է, եւ նա չի կարող, չլինելով Հնչակյան կուսակցության անդամ, լինել Քաղաքական դիվանի անդամ։

- Մամուլում անընդհատ նշվում է, որ ՍԴՀԿ-ն փորձում են պառակտել, որ իշխանական պրոյեկտ կա, եւ փորձում են ՍԴՀԿ-ին եւս մաս դարձնել այդ պրոյեկտին։ Որքանո՞վ են հիմնավոր այդ խոսակցությունները։

- Շատ զարմանալի է, որ մի մարդ, որ քաղաքական դաշտում բավական մեծ ճանապարհ է անցել եւ ինչ-որ չափով նաեւ կշիռ ունի, անուն ունի, խոսքը Վարդան Խաչատրյանի մասին է, դուռը փակում ես, պատուհանից է մտնում, պատուհանը փակում ես, երդիկից է մտնում։ Այստեղ կարելի է մի հետեւություն անել, որ կամ նա նպատակային ինչ-որ ծրագիր է ուզում իրականացնել ՍԴՀԿ-ում, կամ էլ ուղղակի այդ մարդը ինքնասիրություն չունի, այլապես ի՞նչն է պատճառը, որ նա այդ համառությամբ փորձում է ներխուժել ՍԴՀԿ։ Այստեղ կարելի է մի հետեւություն անել, որ կա ծրագիր, որը նա փորձում է իրականացնել ՍԴՀԿ-ում, եւ այդ ծրագրին հավանաբար աջակցում է Վահան Շիրխանյանը, ով, եթե հիշում եք, օրեր առաջ հայտարարում էր, թե անկախ հայ-թուրքական հարաբերություններում ունեցած մեր տարաձայնությունների, մենք շարունակելու ենք մնալ ՀԱԿ-ում, քանի որ մենք համաձայնագիր ենք ստորագրել։ Եւ հանկարծ երեկ պ-ն Շիրխանյանը հայտարարում է, որ այլեւս այս ընդդիմությունը ունակ չէ վճռական քայլերի, որ ունակ չէ շարժման միջոցով արտահերթ ընտրությունների գնալու։ Այսինքն, ստացվում է, որ Վահան Շիրխանյանը, կուսակցության հետ միասին անդամագրված լինելով Կոնգրեսին, բացարձակ չի հավատում ՀԱԿ-ի հաղթանակին։ Այդ դեպքում ինչպե՞ս է նա իր ներկայությունը պատկերացնում Կոնգրեսում, որի հաղթանակին բոլորս հավատում ենք եւ մեկ վայրկյան անգամ չենք կասկածում, որ մեր համատեղ ուժերով հասնելու ենք երկրում իշխանափոխության եւ ունենալու ենք լեգիտիմ ընտրված իշխանություններ, որոնց իրական նպատակը հայ ժողովրդին եւ հայոց պետականությանը ծառայելն է լինելու։ Այդ դեպքում Վահան Շիրխանյանը ինչպե՞ս է տեսնում իր աշխատանքը ՀԱԿ-ում, որը նա չի էլ կատարում։ Եւ երեկ հայտարարում է, թե պետք է ձեւավորվի նոր ընդդիմադիր ուժ, որը կարող է այդ գործառույթը վերցնել իր վրա եւ ժողովրդին տանել դեպի արտահերթ ընտրություններ։ Այսինքն, ինքը ուղիղ ասում է, որ չի հավատում այս ուժին եւ գտնում է, որ պետք է ձեւավորվի նոր ուժ։ Ո՞րն է այդ ուժը, մեզ համար անհայտ է։ Բայց այստեղից հետեւություն ես անում` ինչու են Վահան Շիրխանյանը եւ Վարդան Խաչատրյանը նման համառությամբ փորձում ՍԴՀԿ-ում պրոցես տանել։

- Տիկին Սարգսյան, քանի որ հունվարի 9-ին տեղի է ունենալու ՍԴՀԿ համագումարը, եւ օրակարգում ղեկավար կազմի ընտրություններ են նախատեսվում, դուք հնարավոր համարո՞ւմ եք, որ ղեկավար կազմի փոփոխություն տեղի ունենա, քանի որ մյուս թեւում կան այդ ձգտումները։

- Շիրխանյանը նորություն չի ասում, որ ղեկավար կազմի ընտրություն է լինելու. մեր բոլոր հերթական համագումարներում ընտրվում է նոր վարչություն, եւ վարչությունը ընտրում է նոր ատենապետ, եւ դա մեր կուսակցության կանոնադրության շրջանակներում է։ Իսկ ինչ վերաբերում է իմ վերընտրվելուն, անկեղծ ասած, ես կարծում եմ, որ մեր կուսակցությունը խիստ դեմոկրատական կուսակցություն է, եւ շարքերը կկատարեն իրենց ընտրությունը։ Ինչ վերաբերում է իմ կարծիքին` կվերընտրվեմ, թե ոչ, ապա ամեն դեպքում, կարծում եմ, որ կոնկրետ իմ նկատմամբ համակրանք կա։
http://www.armtimes.com/1490