ՍԴՀԿ ՄՆՈՒՄ Է ԸՆԴԴԻՄԱԴԻ

ՍԴՀԿ Կեդրոնական Վարչության Հայտարարությունը

Վերջին օրերին մամուլում լույս են տեսնում հրապարակումներ, որոնք հիմնված են անճշտությունների և ենթադրությունների վրա, չեն համապատասխանում իրականությանը և միտված են տարակուսանք առաջացնելու ժողովրդի մեջ:

Այս առումով ` հայտարարում ենք

1. ՍԴՀԿ 123 ամյա կուսակցություն է, որ իր ամբողջ պատմության ընթացքում գործել է և այսօր էլ կշարունակի գործել ինքնուրույն: Որպես այդպիսին, մենք հանդիպումներ և խորհրդակցություններ կունենանք ոչ միայն մեզ դաշնակից կուսակցությունների, կազմակերպությունների և անհատների, այլ նաև նրանց, ում հետ մենք ունենք հստակ տարակարծություններ` առանց զիջելու մեր սկզբունքներին:

2. Հավատարիմ լինելով իր գաղափարախոսությանը` ՍԴՀԿ-ն միշտ եղել է սկզբունքային իր դիրքորոշումների մեջ:

3. ՍԴՀԿ-ն առաջնորդվում է միայն հավաքական ղեկավարության հիմունքներով և իր քաղաքական գիծը  ճշտում է համագումարներով:

4. Վերջերս կայացած ՍԴՀԿ-ի  19-րդ Համագումարը հաստատեց Կուսակցության հայաստանակենտրոն  հանգամանքը ու հստակեցրեց, որ ՍԴՀԿ-ն պիտի շարունակի գործել ընդդիմադիր դաշտում, իր համախոհների հետ միասին, մինչև այն պահը, երբ երկրում ազատ չեն արձակվել բոլոր քաղբանտարկյալները և չեն հաստատվել օրինականությունը, ժողովրդավարությունն ու սահմանադրական կարգը:

Հետևաբար, Հայաստանի և Սփյուռքի մեր ժողովրդին հայտարարում ենք , որ ՍԴՀԿ-ի քաղաքական ուղղությունը պայմանավորված չէ ահատներով, և մենք կշարունակենք  հավատարիմ մնալ Համագումարի որոշումներին:

Սոցիալ Դեմոկրատ Հնչակյան Կուսակցության Կեդրոնական Վարչություն
Ք. Երևան
2 Նոյեմբեր, 2009