Քոչարյանն ահաբեկված է, իսկ մարտի 1-ը կբացահայտվի միայն իշխանափոխությունից հետո

«Հայաստանի նախկին նախագահ Ռոբերտ Քոչարյանն ահաբեկված է, քանի որ գիտակցում է, որ մարտի մեկի պատասխանատուն ինքն է եւ մեսիջներ է ուղարկում գործող նախագահ Սերժ Սարգսյանին»: Այս մասին լրագրողների հետ հանդիպման ժամանակ հայտարարեց ՀԱԿ անդամ ՍԴՀԿ ատենապետ Լյուդմիլա Սարգսյանը: «Քոչարյանը կիրառել է ոչ համարժեք գործողություններ, խախտել է Սահմանադրությունը, մտցրել է երկրում արտակարգ դրություն, որի իրավունքը չուներ:

Նա երկար ժամանակ փորձում էր իր մեղքերը բարդել ընդդիմության վրա. խանութների թալանը, ջարդերը եւ այլն: Սակայն ամեն ինչ շատ տեսանելի է, բացահայտված է, եւ Սերժ Սարգսյանի պատրաստակամությունը երկխոսելու եւ մարտի մեկի դեպքերի բացահայտումը ստիպեց Քոչարյանին զգուշացնել երրորդ նախագահին, որ նա միայնակ չի նավի վրա եւ հետեւապես միայնակ չի խորտակվի»,-հայտարարեց Լյուդմիլա Սարգսյանը:

Ինչ վերաբերում է մարտի 1-ի դեպքերի ժամանակ Սերժ Սարսգյանի ունեցած մասնակցությանը, ՍԴՀԿ ատենապետն ասաց, որ վերջինիս մասնակցության հետ կապված ամեն բան պարզ կլինի մարտի 1-ի գործի արդար քննության դեպքում: Ըստ նրա` պատասխանատվության պետք է ենթարկվեն այդ գործում մասնակցություն ունեցած բոլոր պաշտոնյաները` ոստիկանապետ, Պնախարար եւ այլք`յուրաքանչյուրն իր գործածի չափով:

Նա միաժամանակ հավելեց, որ չի հավատում մարտի 1-ը բացահայտելու ուղղությամբ Սերժ Սարգսյանի անկեղծությանը, սակայն ի գիտություն է ընդունում այդ մասին նրա հայտարարությունը: Մարտի 1-ն, ըստ ՀԱԿ ներկայացուցչի, կաբացահայտվի միայն իշխանափոխությունից եւ ՀՀ-ում լեգիտիմ իշխանություն ձեւավորելուց հետո:

Լյուդմիլա Սարգսյանը նաև նշեց որ մինչեւ մայիսի 28-ը ոչ միան Սասուն Միքայելյանն ու Նիկոլ Փաշինյանը, այլ բոլոր քաղբանտարկյալներն ազատ կարձակվեն: Քաղբանտարկյալների ազատ արձակման խնդիրը մշտապես եղել է միջազգային հանրության ուշադրության կենտրոնում, այդ թվում նաեւ ԵԽ մարդու իրավունքների գլխավոր հանձնակատար Թոմաս Համերբերգի, ով իր վերջին զեկույցում կրկին անդրադարձել է վերջիններիս ազատ արձակման խնդրին:

«Ուզում եմ ՍԴՀԿ-ի գոհունակությունը հայտնել Համերբերգի զեկույցի կապակցությամբ: Համերբերգը շատ հետեւողական է զբաղվել մարտի մեկի դեպքերի բացահայտմամբ: Նա մշտապես այցելել է ՔԿՀ-ներ, լավատեղյակ է այդ խնդիրներին եւ մշտապես վեր է հանել դրանք: Նա ազնվագույն գործիչ է: Նա ստիպել է ՀՀ իշխանություններին զբաղվել մարտի մեկի դեպքերի բացահայտմամբ` հրապարակելով կոշտ զեկույց: Սա լուրջ ազդակ է իշխանություններին` քաղբանտարկյալներին ազատ արձակելու համար»,-նշեց Սարգսյանը:

Ըստ նրա, բոլոր քաղբանտարկյալները մինչեւ իրենց պատժաչափի ժամկետի վերջին օրը կանցկացնեին բանտերում, եթե չլիներ ՀԱԿ-ի շուրջ համախմբված հասարակության հետեւողական պահանջը նրանց ազատ արձակելու վերաբերյալ: ՍԴՀԿ ատենապետի խոսքով` այդ պայքարի արդյունքում փոխվել է քաղաքական իրավիճակը, ինչն էլ ստիպել է իշխանություններին ընդառաջ գնալ ՀԱԿ-ի պահանջներին եւ զբաղվել մարտի 1-ի եւ մատիմեկյան զարգացումների խնդրով: