Տեղյակ չեն դաշինքից

«Նոր ժամանակներ» կուսակցության նախագահ Արամ Կարապետյանը հայտարարել է քաղաքական դաշտում նոր դաշինք ձեւավորելու մասին: «Ես այս դաշինքում տեսնում եմ Հայաստանի երեք ավանդական կուսակցություններին եւ երկու համեմատաբար նոր ուժերի` «Ժառանգությանն» ու «Նոր ժամանակներին», որոնք ազգային պետական դոկտրինի կողմնակից են: Կարծում եմ` սա հրաշալի կոնգլոմերատ կարող է լինել: Հիմա կա ազատական հիմքերի վրա ստեղծվող երկխոսություն` նկատի ունեմ Կոնգրես-ՀՀԿ երկխոսությունը, ուստի` մյուս բևեռն էլ պետք է լինի ազգային պետականության գաղափարախոսությունը: Սա կլինի ոչ միայն նախընտրական դաշինք, այլ միտված կլինի ապագային` որպես դոկտրինի մի մաս»,- այսօր մամուլում հայտարարել է նա:

 
Ավանդական կուսակցություններից ՍԴՀԿ եւ ՀՅԴ ներկայացուցիչների հետ զրուցեցինք կազմավորվելիք դաշինքի մասին:
 
Արտյուշա Շահբազյան – ԱԺ ՀՅԴ խմբակցության քարտուղար
 
- Ես տեղյակ չեմ դրանից: Այդ առաջարկով իրենք պետք է ՀՅԴ գերագույն մարմնին դիմեն, այնտեղ էլ քննարկենք:
 
- Ինքներդ հավանական համարո՞ւմ եք այդ դաշնքի կայացումը:
 
- Սկզբում պետք է պարզել`եղել է առաջարկ, թե ոչ: Կա կուսակցական մարմին, որն էլ կքննի ու կորոշի` նպատակահարմար է դաշինքի ձեւավորումը, թե ոչ: Հարկավոր է հստակեցնել խնդիրը, որ այս ուժերով ցանկանում ենք դաշինք ստեղծել, նպատակը սա է, գնում ենք այս ծրագրով, որպեսզի ԳՄ-ն էլ իմանա` ինչի համար է գնում: Բազարի առեւտուր չի կարող լինել, որ եկեք միանանք, ամենքս այսքան դնենք, գնանք, այս գործն անենք: Չի լինի նման բան:
 
- Արամ Կարապետյանը հայտարարել է, թե իրենք ցանկանում են  ազգային պետականության գաղափարի վրա հիմնված դաշինք ձեւավորել:
 
- Չգիտեմ… Քաղաքական դաշինքները լինում են պրակտիկ, եւ ձեւավորվում են կոնկրետ խնդիրների շուրջ: Անունը կարող ես դնել ազգային դաշինք, բայց կարեւորը, թե ինչ խնդիրներ ես դնում այդ դաշինքի առաջ:
 
- Արամ Կարապետյանը ցանկություն ունի, որ դա կլինի ոչ միայն նախընտրական դաշինք, այլեւ միտված կլինի ապագային: ՀՅԴ-ն միշտ մենակ է մասնակցել ընտրություններին: Ձեր կարծիքով` այս անգամ է՞լ մենակ կմասնակցեք:
 
- Այդ ամենը կախված է նպատակահարմարությունից: Այո, շատ դեպքերում նպատակահարմար ենք համարել առանձին մասնակցել ընտրություններին: Բայց այդ հարցը պետք է Գերագույն ժողովի ժամանակ որոշենք: Ես ինքս չեմ կարող ԳԺ փոխարեն պատասխանել:
 
- Այնուամենայնիվ, կարելի՞ է ենթադրել, որ չեք բացառում ընտրություններին մենակ մասնակցելը:
 
- Չի բացառվում, այլեւ` շատ հավանական եմ համարում:
 
Գուրգեն Եղիազարյան – ՍԴՀԿ անդամ, ԱԱ նախկին փոխնախարար
 
- Նախ եւ առաջ ասեմ, որ ՀՀ-ում գործում է կուսակցությունների մասին օրենքը, եւ համաձայն դրա` դրսի ոչ մի կուսակցություն իրավունք չունի մասնակցելու երկրի ներքաղաքական կյանքին: Այդ օրենքում այդ դրույթնեը նշված են հստակ, որ դրսից ոչ մի կուսակցություն չի կարող գործնական մասնակցություն ունենալ երկրի ներքաղաքական կյանքին, իսկ վիրտուալ` որքան ցանկանան:
 
- Արամ Կարապետյանը հայտարարել է, թե ինքը զրուցել է ՍԴՀԿ համաշխարհային կառույցի ղեկավարների հետ, իսկ ՀՀ-ում համագործակցելու է Սեդրակ Աճեմյանի կուսակցության հետ:
 
- Եթե Արամ Կարապետյանը բանակցություններ է վարում չակերտավոր Հնչակյանների հետ,ես դա լուրջ չեմ համարում: Նա ոչ թե կուսակցության, այլ անհատների հետ է բանակցություններ վարում: Սեդրակ Աճեմյանի կառույցը գրանցվել է Հնչակյան անունով, բայց կառույցը համագումար չի արել, ատենապետ չի ընտրել: Այնպես որ, այդ չակերտավոր կուսակցության հետ ցանկացած բանակցության հանդեպ ես անտարբեր եմ:
 
ԱԺ Ժառանգություն խմբակցության ղեկավար Ստեփան Սաֆարյանը մեզ հետ զրույցում ասաց, թե ինքը ծանոթ չի թե ինչ դաշինքի մասին է խոսքը:

http://www.lragir.am/armsrc/country48008.html