«ԳՆԱԼՈՒ ԵՆՔ ՄԻՆՉԵՎ ՎԵՐՋ ՈՒ ՄԻԱՆՇԱՆԱԿ ՀԱՂԹԵԼՈՒ ԵՆՔ»

Օրերս Լևոն Տեր-Պետրոսյանը հայտարարեց, թե Հայաստանի իշխանությունները խաբել են ԵԽ-ի ներկայացուցիչներին։ «Չեմ կարծում, թե միջազգային հանրությունը շատ խաբված է: Միգուցե ուզո՞ւմ են դեռ խաբված լինել: Եվրոպական կառույցները չեն կարող չիմանալ, թե Հայաստանում ինչ է կատարվում: ՀԱԿ-ը բազմաթիվ հանդիպումների ժամանակ ներկայացնում է երկրի ոչ ժողովրդավարական վիճակը, նամակներ ուղղում այդ կառույցներին: Հավանաբար, դեռ չի եկել այն պահը, որ նրանց արձագանքը շատ սուր լինի: Այժմ պահն արդեն հասունացել է, քանի որ այն հանցագործությունները, որոնք այս իշխանություններն են թույլ տվել տարիներ շարունակ, բումերանգի նման, ի վերջո, հարվածելու են նրանց: Ինչ վերաբերում է Տեր-Պետրոսյանի ասածին, կարծում եմ, ամեն մի անկախ, ինքնիշխան պետություն ինքը պետք է զբաղվի իր երկրում ժողովրդավարության հիմքերի հաստատմամբ, և այս ուղղությամբ միայն ՀԱԿ-ն է աշխատում: Վստահ եմ, որ ոչ միայն Հայաստանում են հասկացել, այլև աշխարհն է ընկալել, որ կոնգրեսն իրական այլընտրանք է դարձել իշխանություններին: Շատ գոհ եմ, որ շարժումն այս ճանապարհով է գնում: Արագ հաղթանակները միշտ չէ, որ կարողանում են ժողովրդավարության հիմքերն ամրացնել, իսկ կոնգրեսի առաքելությունը հենց դա է»,- մեր դիտարկմանն այսպես արձագանքեց ՍԴՀԿ ատենապետ ԼՅՈՒԴՄԻԼԱ ՍԱՐԳՍՅԱՆԸ:
-Այսօր իշխանություններն ընդդիմությանն են մեղադրում, թե դրսից «տղա են բերում», «դրսի տղաներն» էլ ասում են՝ մենք Հայաստանի ներքին խնդիրների հետ գործ չունենք: Փաստորեն, ժողովրդավարության հիմքերն ամրացնելու ողջ ծանրությունը կոնգրեսն իր ուսերի՞ն պիտի «տանի»:
-Նախ` Հայաստանը ԵԽ-ի անդամ է, իսկ այդ «տղաներին» ժամանակ առ ժամանակ Սերժ Սարգսյանն է հրավիրում Հայաստան: Այնպես որ, մենք «տղա բերելու» խնդիր չունենք: Եթե իշխանությունն այնտեղ ներկայացնում է, թե ամեն ինչ լավ է, բնականաբար, որպես ընդդիմություն պարտավոր ենք իրականությունը ներկայացնել, ինչն էլ անում ենք: Ինչ վերաբերում է վերջին հանրահավաքին, երբ «տղաներն» այստեղ էին, ինչո՞ւ մենք չպիտի օգտվեինք դրանից և ավելի տեսանելի չդարձնեինք երկրում ստեղծված իրավիճակը, այն դեպքում, երբ բազմաթիվ նամակներով նրանց արդեն դիմել էինք: Իսկ «տղա բերելը» նրանց է հատուկ, ովքեր «գողական» աշխարհից են:
-Նշեցիք, որ ընդդիմության խնդիրը ժողովրդավարության հիմքերի ամրացումն է. այդ ճանապարհին որքանո՞վ եք կարևորում հերթական խորհրդարանական ընտրություններին կոնգրեսի մասնակցությունը, քանի որ ընտրությունը ևս ժողովրդավարության բաղկացուցիչներից է:
-Այսօր վերստին փորձում են ընտրական օրենսգիրքը բարեփոխել: Շատ ծիծաղելի է, որ Հայաստանի նման երկրում որևէ մեկը կարող է հույսը դնել օրենսգրքի բարեփոխման վրա: Հայաստանում վերջին տասնամյակում երբևէ ընտրական օրենսգիրքը չի աշխատել: Եթե նույնիսկ ամենաանկատար օրենսգիրքը կիրառվեր, այս երկրում արդար ընտրություններ կլինեին: Բայց օրենսգրքի կատարելությունը մեզ համար երաշխիք չէ, որ գալիք հերթական ընտրությունները կանցնեն թափանցիկ և արդար: Մեր երկրում ոչ մի արդար ընտրություն չի կարող տեղի ունենալ նույնիսկ չափազանց կատարելագործված օրենսգրքի պարագայում, քանի դեռ իշխում է այս օլիգարխիկ կլանը: Ավելի շատ կցանկանայի խոսել արտահերթ ընտրությունների մասին, ինչն արդեն իսկ տեսանելի է, որովհետև այս իշխանությունները փակուղում են: Պատահական չէ, որ ԱՄՆ-ում հանցավոր խմբավորում է բացահայտվում: Կարծում եմ՝ տարիներ առաջ այն արդեն բացահայտված էր, սակայն հարմար պահի էին սպասում: Քաղաքականության մեջ ոչինչ պատահական չի լինում:
-Ի դեպ, իշխանության կողմից այս առումով փոխադարձ մեղադրանք հնչեց, թե «պզոներ» նաև Տեր-Պետրոսյանի տարիներին կային:
-Չեմ բացառում: Վստահ եմ նաև, որ հետո էլ կլինեն, քանի որ հանցագործ աշխարհն ամեն երկրում էլ իր «պզոներն» ունի: Բայց սա չի նշանակում, որ Տեր-Պետրոսյանը կամ որևէ այլ երկրի նախագահ պիտի համագործակցի նրանց հետ: Տարբերությունը դա է: Այսօր տեսանելի է արդեն այս իշխանության ու «Պզոյի» կապը, ինչն ԱՄՆ-ի Դաշնային բյուրոյի դատախազությանն իրավունք է վերապահում «ազատ» Հայաստանի բանկային համակարգում հետաքննություն անցկացնելու: Մինչդեռ սա մեր անվտանգության օղակներից մեկն է: Սա նշանակում է, որ իշխանություններն այնքան թույլ են, որ կարողացել են կոմպրոմատների լեզվով նրանց հետ խոսել։
-Վերադառնալով արտահերթ ընտրությունների թեմային՝ նախ պարզենք՝ խորհրդարանակա՞ն, թե՞ նախագահական:
-Համոզված եմ՝ լինելու են արտահերթ նախագահական ընտրություններ, որովհետև չեմ կարծում, որ Սերժ Սարգսյանն ի վիճակի է լուծարելու խորհրդարանը: Այսօր օրենսդիր օրգանը վերածվել է մի հանցավոր խմբավորման, որտեղ բոլոր օրենքներն ուղղակիորեն հարմարեցվում են կլանի շահերին: Ամեն կարգի ընտրություն կարող է իրականանալ, եթե այս տեսակը վերանա իշխանական համակարգից: Իհարկե, կան ազնիվ մարդիկ, ովքեր կլանի զոհերն են, քանի որ չեն կարող չպահել խաղի կանոնները: Եթե խախտեն, կոչնչանան:
-Արտահերթ նախագահական ընտրություններում կոնգրեսը Տեր-Պետրոսյանի՞ն է առաջադրելու:
-Մենք բոլորս համախմբվել ենք Լևոն Տեր-Պետրոսյանի շուրջը, և մեր միակ ու նախընտրելի թեկնածուն նա է: Գնալու ենք մինչև վերջ ու միանշանակ հաղթելու ենք:
-Այսօր իշխանական ուժերի մեջ լուրջ խլրտումներ են գնում, չնայած վերջիններս դրանք մտացածին են համարում: Ձեր տպավորությամբ այդպե՞ս է:
-Կարծում եմ՝ նրանց մեջ կա լուրջ հակասություն: Փողի վրա կառուցված գաղափարազուրկ իշխանությունը, որքան էլ նույն շահերով առաջնորդվի, վաղ թե ուշ փլուզվելու է նույն հակասությունների պատճառով:
-Ընդդիմադիր բևեռն էլ միատարր չէ: ՀՅԴ-ն ՀԱԿ-ին խիստ արմատական է համարում, պարզ չէ` «Ժառանգությունը», ի վերջո, կոնգրեսին կմիանա՞, թե՞ ոչ: Ի՞նչ է սպասվում այս «ֆրոնտում»:
-Հայաստանում կարող է լինել միայն արմատական ընդդիմություն, որովհետև ընդդիմություն խաղալով այս իրավիճակը չես կարող փոխել: Միայն արմատական ընդդիմությամբ կարող ես դրական արդյունք ապահովել: Մեկ տասնամյակից ավելի հայ ժողովրդի նկատմամբ իրականացվում է քաղաքական, տնտեսական, բարոյահոգեբանական, արժեհամակարգային տեռոր: Այս ամենը մարդկանց մղում է տոտալ արտագաղթի, երկիրը լքում են շարքային քաղաքացին, մտավորականը, ազնիվ գործարարը: Եթե սրա դեմն արմատական ընդդիմությունը չկարողանա առնել, երկիրը կործանվելու է: Եթե այս իրավիճակով հերթը հասնի հերթական ընտրություններին, կարող ենք այլևս չմասնակցել:
-Երբ Տեր-Պետրոսյանը նախավերջին հանրահավաքի ժամանակ խոսեց կոռուպցիայի մասին, ոմանք նրա ելույթում հայ օլիգարխներին ուղղված «մեսիջներ» նկատեցին: Ձեր մեկնաբանությունը:
-Տեր-Պետրոսյանն իր կարծիքի մեջ ազնիվ էր: Բոլոր օլիգարխներն էլ այս համակարգի զոհերն են: Իհարկե, կան մարդիկ, որոնց վարքագիծը և՛ քաղաքականության, և՛ բիզնեսի մեջ արդարացում չունի, սակայն ՀԱԿ-ը խնդիր չունի որևէ մեկին մեսիջ ուղարկելու: Յուրաքանչյուր նորմալ գործարար կցանկանար աշխատել օրինականության դաշտում ու հանգիստ ապրել այս երկրում։ Դա ավելի պատվաբեր է:
-Եթե արդարացման ոչ ենթակա գործարարները կանգնեն կոնգրեսի կողքին, նշանակում է` «արդարացա՞ն»:
-Այս հարցին կարող են պատասխանել այն մարդիկ, ովքեր զբաղվելու են բիզնեսով: Կարծում եմ՝ այդ պարագայում նրանց գործունեությունը կտեղափոխվի օրինական դաշտ, կվերահսկվի: Եթե հանցագործ են, կպատժվեն:
-Եվ վերջում` եռանախագահների առաջիկա հանդիպումն Աստրախանում: Ի՞նչ ակնկալիքներ ունեք:
-Նման կարգի հանդիպումների մասին, սովորաբար, գոնե մեկ ամիս առաջ հայտարարում են, մեկ շաբաթ առաջ օրակարգ է ներկայացվում: Սա ժամերի ընթացքում կայացված որոշում էր, և մեր «տղային» ուղղակի «բերման են ենթարկել»՝ նախապատրաստելով Աստանայի հանդիպմանը:
Զրուցեց Ռուզան ԽԱՉԱՏՐՅԱՆԸ
http://www.idefacto.am/page.php?section=news_more&id=3779