Բաց նամակ

Այն բանից հետո, երբ հայտնի դարձավ, որ ՍԴՀԿ հայաստանյան Կենտրոնական վարչության 2 անդամներ, ՍԴՀԿ ԿՎ ատենապետ Սեդրակ Աճեմյանի եւ ՍԴՀԿ քաղաքական դիվանի անդամ Վահան Շիրխանյանի դրդմամբ, արտահերթ համագումար են պահանջում, ՍԴՀԿ հայաստանյան կառույցը բաց նամակ է ուղարկել ՍԴՀԿ ԿՎ անդամներին։ «Հարգելի հնչակյաններ, այս քայլով որոշ ծախուներ վտանգում եւ տրոհման եզրին են կանգնեցնում համահնչակյան մեր կառույցը, որի մասին բազմիցս ժամանակին մենք տեղեկացրել ենք ԿՎ մեր ընկերներին։ ...Ոտնահարելով ՍԴՀԿ վարիչ մարմնի որոշումը` ծախուների մի խումբ համահնչակյան ընտանիքին խառնաշփոթի մեջ գցելու նպատակով հայտարարում է «արտակարգ» համագումար։ Տեղեկացնում ենք ձեզ, որ ՍԴՀԿ հայաստանյան կառույցը իր գործունեությունը ծավալում է համագումարով հաստատված ծրագիր-կանոնակարգի համաձայն։ Ծրագիր-կանոնակարգի մեջ «արտակարգ համագումար» հասկացությունը ամրագրված չէ։ Այսինքն, «ընկերներ» կոչվածները չէին բարեհաճել հայտարարություն անելուց առաջ կարդալ ծրագիր-կանոնագիրը»,- գրել են բաց նամակի հեղինակները։ Նրանց խոսքով, 10-12 հոգի «փորձ են կատարում խեղաթյուրել իրականությունը, որպեսզի ամեն գնով` մինչեւ իսկ կուսակցությունը պառակտելու ճանապարհով, կատարեն իշխանությունների կողմից պատվիրված ծրագիրը»։ «Մինչ այս «հայտարարությունը»` մենք զերծ էինք մնացել իրերն իրենց անուններով կոչելուց։ Այժմ պետք է տեղեկանաք, որ կուսակցության ներսից քայքայման գործընթացի հեղինակը եւ գաղափարախոսը, ցավոք սրտի, ՍԴՀԿ ԿՎ ատենապետ Սեդրակ Աճեմյանն է։ Ի տրտմություն բոլորիս, այն անձնավորությունն է հեղինակում այս ամենը, որը կոչված էր ամրացնելու եւ հզորացնելու կուսակցությունը»,- գրել են հայտարարության հեղինակները` հավելելով, որ «օրենքի շրջանակներից դուրս ՀՀ տարածքում անօրինական եւ կեղծ համագումար անցկացնելու դեպքում իրենք հարց են բարձրացնելու ԿՎ առջեւ` ատենապետ Աճեմյանի կուսակցական վարքագիծը արտահերթ համագումարում քննության առնելու համար»։ Հայտարարությունը ստորագրել են ՍԴՀԿ հայաստանյան վարիչ մարմնի 4 անդամներ` Լ. Սարգսյանը, Հ. Եղիազարյանը, Ա. Գաբրիելյանը եւ Ա. Ալեքյանը։
http://www.armtimes.com/5999