Հայ ազգային կոնգրեսի համակարգող Լևոն Զուրաբյանը օրերս լրագրողների հետ հանդիպմանը հայտարարել էր, թե իշխանության հետ երկխոսությունը այլևս երկիրը ստեղծված իրավիճակից դուրս բերելու գործիք չեն համարում: Ի՞նչ է սա նշանակում, հարցրեցինք ՍԴՀԿ ատենապետ Լյուդմիլա Սարգսյանին:
«Այն խնդիրները, որոնք մենք առաջ էինք քաշում և ակնկալում էինք բանական մոտեցում իշխանության կողմից` կարծես թե չարդարացավ, որովհետև մենք գործ ունենք իշխանությունների հետ, որոնք բռնի ուժով եկել են իշխանության և պատրաստ չեն հրաժարվելու դրանից թեկուզ հայ ժողովրդի ապագայի համար, ընդ որում՝ շատ լավ հասկանալով, թե որքան խոցելի են իրենք արտաքին աշխարհի համար և որքան անընդունելի՝ մեր ժողովրդի համար: Հետևաբար, շարունակել երկխոսության թեման, իմիտացիա անել, թե գործընթացները կարող են այլ ընթացքով գնալ և երկխոսության արդյունքում ձեռք բերել փոխըմբռնում`անիմաստ է այլևս»,- նշեց Լ.Սարգսյանը:
«Քանի որ ժողովուրդը խիստ պահանջներ ունի այսօր և այլևս անհնար է համարում այս երկրում գոյատևումը և դրա համար պատրաստ է ակտիվ պայքարի դուրս գալ իր իրավունքները վերականգնելու` ես կարծում եմ, որ կլինեն այլ զարգացումներ, իսկ իշխանությունները պետք է հասկանան, որ այլևս անելիք չունեն այս երկրում»:
Օրերս «168 ժամ» թերթին տված հարցազրույցում Հայաստանի ԱԳ նախկին նախարար Վարդան Օսկանյանն անդրադառնալով ակտիվ քաղաքականություն` Ռոբերտ Քոչարյանի վերադարձի, ընտրություններին ինչ-որ կերպ մասնակցելու հավանականության մասին հարցին, պատասխանել էր. «Իմ ենթադրությունն այն է, որ Քոչարյանը վերջիվերջո քաղաքական ներգրավվածություն ունենալու է: Նախ` խորհրդարանական ընտրություններն են: Այնտեղ, ես կարծում եմ, որ ինչ-որ դրսևորում կլինի»:
Լյուդմիլա Սարգսյանին հարցրեցինք, թե Ռ.Քոչարյանի հնարավոր վերադարձի ինչ հնարավորություն է տեսնում և ո՞ր կուսակցություններն ու գործիչները կարող են որպես հենարան ծառայել նրա հնարավոր վերադարձին:
«Վարդան Օսկանյանը կամ Ռոբերտ Քոչարյանի իրական իմիջին տեղյակ չի, կամ էլ չի ուզում հավատալ, որ այն նախագահի օրոք, որ աշխատել է` այդ նախագահն այլևս քաղաքականություն վերադարձի հնարավորություն չունի: Ես դա համարյա անհնարին եմ համարում: Մարդ, որը Մարտի 1 է իրականացրել, զենք է կիրառել մեր ժողովրդի նկատմամբ` նա ընդմիշտ մերժված է լինելու մեր ժողովրդի կողմից: Իսկ այն քաղաքական ուժերը, որոնք ժամանակին աջակցել էին իրեն` միգուցեև կերազեին նրա վերադարձը, բայց կարծում եմ, նրանք ավելի իրատես են, քան Վարդան Օսկանյանը»,- ասաց նա՝ մատնանշելով Ռ.Քոչարյանի և Վ.Օսկանյանի օրոք ԼՂ-ին կարգավորման բանակցություններից դուրս մղելու փաստը և այլ ձախողումներ:
Կարելի՞ է բացառել, որ ԲՀԿ-ն կամ Դաշնակցությունը ինչ-որ մի պահի Ռ.Քոչարյանին աջակցելու հնարավորությունից չեն ցանկանա օգտվել՝ հարցրեցինք Լ.Սարգսյանին. «Դրանք այն կուսակցություններն են, որոնք ամեն դեպքում ռեալ հաշվարկել գիտեն, և իրենց շահերը չեն կարող համահունչ լինել Ռոբերտ Քոչարյանի շահերի հետ, իսկ ԲՀԿ-ն կամ Դաշնակցությունը, կարծում եմ, դեռ կուզենային դերակատար լինել հայաստանյան քաղաքական դաշտում»:
Комментариев нет:
Отправить комментарий
Примечание. Отправлять комментарии могут только участники этого блога.